Un oto sobre un tas (2)
Mércores, 15 de Maio, 2013O dos encrucillados e xogos lóxicos é todo un mundo, que de cando en vez alguén, como se quixera darlle un verniz respectable, recupera para dicir que son moi bos, por exemplo, para manter a axilidade mental. Polo que a min se refire, teño algunhas manías con eles. Por exemplo, non me gustan nin demasiado doados nin moi complicados. Ás veces, súbolles a dificultade: por exemplo, o xogo das cruzadas resólvoo por orde: primeiro, as palabras de doce letras, despois as de once… No outro extremo están os mal feitos, eses que están cheos de letras soltas e de palabras ao revés, demostración de que o autor é frouxiño. Hai unhas semanas, alguén nos ofreceu uns encrucillados dixitais para a web. Cando fun facelos, para probalos, atopeime con algo que nunca me pasara en máis de trinta anos cubrindo pasatempos: o 80 por cento das palabras eran ao revés. Xa nin me molestei en contestarlles cunha negativa.
E en canto á axilidade mental, pode que proporcionen algunha (a mesma que eses xogos mentais para consola), aínda que discuto máis esa teoría de que enriquecen o vocabulario. Grazas aos encrucillados sei como se chaman unha engra de prateiro, un manto de beduíno ou o principal río de Suíza… pero, a verdade, nin me é imprescindible para vivir nin creo que vaia usar esas palabras fóra dese contexto. A única excepción ocorreume en Madrid, cunha señora de Puebla de Don Fadrique (1), a quen lle oín falar dun cruento atropelo, no que á vítima víanselle “todas as asaduras”, palabra que ata daquela nunca vira/oíra fóra dos cadros dun encrucillado.
(1) Puebla de Don Fadrique é unha vila de sonoro nome da provincia de Granada. Á vista da súa web, debe de estar moi afectado polo vandalismo das bandas, que iso debe de ser o que significa ese ‘bandalismo’ que aparece na enquisa dixital sobre os principais problemas deste concello de case 2.400 habitantes.
NO QUIOSCO vexo con sorpresa que aínda sobreviven unhas poucas revistas de pasatempos. Sorpréndeme porque nestes tempos de ocio dixital, nos que te divirtes contra unha máquina, parece inconcibible que aínda teña vida propia (fóra dos xornais) este ocio analóxico, de lapis e papel, aínda que certamente varias cabeceiras quedaron no camiño. A miña relación cos pasatempos é inconstante dende que os descubrín a finais da primaria (vía