Nin o luxo nos queda
Vivimos tempos revoltos, agardemos que non sexan como os da serie de televisión. Pénsoo mentres paseo polo centro de Lugo e vexo as tendas que pechan, nese incesante goteo que nos vai deixando sen algúns referentes e que ameaza con deixar algunhas rúas tan baleiras como a da foto (nocturna, aclaro). Por exemplo, pecha ‘Home’, que era o típico comercio ao que acodes só para unha cousa (vodas, bautizos, comuñóns… cerimonias en xeral) e que, por esa mesma especialización, parece que vai sobrevivir a todo. Tamén pechou algunha óptica na Avenida da Coruña, e iso que o coidado persoal seica é dos poucos sectores que sobreviven: ou sexa, que aínda hai aí o que agora se chama un ‘nicho de mercado’ (unha expresión que me parece infame e digna de que colguen ao autor).
O sorprendente é ver que desaparecen mesmo as tendas de compravenda de ouro (na Fonte dos Ranchos), algo que ata hai pouco parecía imposible.
Pero quizais a clausura máis inesperada, aínda que seguramente é por temas cronolóxicos (xubilación), é a de Aramits, unha das poucas (a única?) tendas de roupa de luxo da cidade, nas galerías de Radio Lugo. A lenda dicía que había quen saía á rúa cunha bolsa desta tenda só por fardar. Agora haberá que buscar outros referentes.