Nestes primeiros días de campaña, vexo que os candidatos expresan unha gran preocupación polos máis novos, como se na man destes estivera o voto decisivo. É curioso, porque ocorre nunha comunidade na que a pirámide de idade é máis abombada por enriba que por abaixo. Hai algún concello de Lugo no que no grupo de 70 a 80 anos hai máis electores que no de 18 a 25. Os datos oficiais din que só hai
106.330 electores novos dende as pasadas eleccións autonómicas; en Lugo, 12.963. Para este grupo, cada día máis interesante para os publicistas pero cada día menos abundante en Galicia, anúncianse nos programas electorais pisos de aluguer a baixo prezo; o reforzamento do ensino, en especial o universitario; a mellora da súa calidade e, sobre todo, medidas de emprego específicas, para rematar coa precariedade e tamén coa emigración. Este último, o da fuxida do país das xeracións chamadas a se-lo noso recambio, é un dos principais argumentos de campaña do PSOE e do BNG.
Os partidos, ademais, levan ás formas esa preocupación que din ter polos máis novos. Nos mitins, colócanos detrais dos candidatos, con postas de escea case calcadas e moi de eleccións norteamericanas (outro día teño que volver sobre as postas en escea). E non sei se o fan para lanza-la mensaxe de que “a mocidade está connosco” ou se é para animar ós demais asistentes ó mitin, porque son ben ruidosos, moi buliciosos e ás veces semellan estar como extasiados. Na campaña das municipais do 2003 vin a unha candidata de Monforte repartindo pegatas entre os mozos nos pubs. Non sei se nesta chegarán a tanto. Outra cousa que descoñezo é se os mozos que estean preparando exames dentro de dous domingos terán tempo ou ganas de saír da casa para ir votar.
E para confirmar ese interese polo que antes se chamaba “xeracións do mañá”, os partidos maioritarios levan nas súas listas a representantes das súas formacións xuvenís, que nestas primeiras xornadas de campaña amósanse moi activas, especialmente Novas Xeracións. Pero ti repasas as candidaturas e dis “que ben, pensan nos menores de trinta” (idade tope para pertencer a algunha destas organizacións), pero despois miras o posto en que van (en Lugo, o doce no PP, o oito no PSOE e o seis no BNG), todos eles de elección pouco menos que quimérica, e xa non sabes qué pensar.
(Publicado en El Progreso, 6/6/2005)

Esta entrada se publicó el Luns, 6 de Xuño , 2005 a las 0:00 am y está clasificada en Xeral. Puedes seguir las respuestas a través de el feed RSS 2.0. Puedes dejar una respuesta, o trackback desde tu sitio.