Un acaba por pensar que a movida co DNI da infanta Cristina é consecuencia das présas ou, peor, do descoido, que leva a encher os papeis oficiais co primeiro número que se lle vén a un á cabeza. E dígoo eu, que o pasado xoves, coas présas, cubrín un impreso en Correos no que lle din o meu nome a unha vía e en lugar de ‘Ángel Vaqueiro’ puxen o nome da miña rúa (algo así como “chámome Ribadeo e traballo na Rúa Ángel Vaqueiro”). E penso no da Infanta á vista do que se está a descubrir estes días. Sabido é que a familia real ten os primeiros DNIs de España. A nosa Duquesa de Lugo é o 00000013; a infanta Cristina, o 00000014 e o príncipe Felipe, o 00000015, se non recordo mal. E pensas no que pasou coas supostas propiedades da filla do Rei e pregúntaste se pasará iso noutros eidos. Miras o Boletín Oficial da Provincia de Lugo, porque é o máis próximo, e…. bingo!

Abonda con poñer eses DNIs no buscador para ver que…

• A infanta Cristina supostamente non pagou o imposto de vehículos (IVTM) de Muras dende o ano 2004.
• A infanta Elena tampouco pagou presuntamente o IVTM nese concello dende o mesmo período.
• O príncipe Felipe nin pagou o mesmo imposto en Muras, nin o do lixo en Becerreá. Isto si que é mobilidade xeográfica.

Pregúntome se algún dos tres terá oído falar dalgún deses concellos nos que xente co seu DNI (ou, para ser máis correcto, a quen lle atribuíron o seu DNI) ten vellas débedas coas arcas municipais.

Estes días, con iso da imputación de Magdalena Álvarez no caso dos ERE, moitos recordan a súa famosa frase sobre o “plan Galicia de merda”. Na súa etapa de ministra de Fomento, prodigouse bastante pola provincia de Lugo, aínda que os seus actos sufriron unha evolución que é un perfecto símbolo do que pasou co PSOE e o zapaterismo. A súa primeira visita, moi triunfal, foi co propio Rodríguez Zapatero, nada menos que o Sábado das Mozas de San Froilán, no ano 2004. Daquela xa se lle escapara a famosa frase do “plan Galicia de merda”, e no discurso na casa do concello referiuse a ese forte investimento. Despois inaugurou varios tramos de autovía, acompañada do entón presidente da Xunta, Emilio Pérez Touriño, e unha das últimas visitas foi no 2009, para anunciar a nova ponte sobre o Miño: si, a que agora en Lugo é coñecida como ‘ponte branca’.  Daquela, as visitas xa case eran ás agochadas.

Na foto, tomada na visita do 9 de outubro de 2004, aparece co que sería o seu sucesor no ministerio, José Blanco. Agora, visto dende a distancia, un dáse conta do correcta que era a súa frase, que daquela xerara moito rebumbio (empezando polo daquela conselleiro de Política Territorial, Alberto Núñez Feijóo). Porque está claro que o Plan Galicia foise á merda, empezando por aquel espellismo do AVE pola cornixa cantábrica e rematando polas autovías que aínda hoxe seguen sen acabarse.

Velaquí o bo de que haxa unha ministra tan noviña no Goberno de Zapatero: que algún poderá gabarse de que ten máis patrimonio que Bibiana Aído, segundo os datos publicados no BOE do pasado xoves. Abonda con que a vivenda dun mesmo teña un valor catastral superior a 38.918 euros. E a algúns xa nos gustaría chegar algún día aos case cinco millóns de Garmendia (que ten inmobles por un valor de 1,4 millóns: cantas vivendas ten esta muller?). Daríamonos cun canto nos dentes se Facenda se levara a metade de noso soldo, porque iso significaría que o salario anual ten seis ou sete cifras. E, xa postos a pedir, tamén nos gustaría ver as declaracións patrimoniais da clase política lucense.

Ás veces, o noso traballo reflíctese nos sitios menos pensados. Por exemplo, quen nos ía dicir hai uns días que iamos darlle motivo a Francisco Jorquera, deputado do BNG no Congreso, para facerlle unha pregunta ao Goberno. Porque a interpelación que vén de presentar ten o seu punto de partida nos datos que publicou Álvaro neste xornal o 20 de xullo pasado. Isto de que te utilicen de referente ten o seu punto. 

Leo na prensa de Madrid que en certos círculos do PP empeza a ser un clamor a solicitude de que Mariano Rajoy destitúa a Luis Bárcenas, senador e tesoureiro do partido, imputado provisional polo caso Gürtel. Porén, a consigna oficial é o silencio cara fóra, agás Esperanza Aguirre, que sempre vai por libre con tal de torpedear ao presidente do PP. En Galicia, mesmo Núñez Feijóo tense saído pola tanxente cando lle preguntaron polo caso e os seus derivados (creo que a pregunta concreta ía sobre o seu homólogo valenciano) nunha rolda de prensa en Santiago.

Pregúntolle a Xosé Manuel Barreiro, mandamáis provincial do PP de Lugo, que é compañeiro de grupo de Bárcenas no Senado (no listado alfabético, curiosamente, van seguidos), e atense á consigna oficial: silencio. Segundo conta, o seu trato con el non ten pasado dalgún cortés saúdo, deses que das cando te cruzas cun coñecido nunha escaleira, por exemplo. Así que pregunto noutros ambientes do PP, de xeito off the record, e o certo é que tamén en Lugo están devecendo por que Rajoy se cargue a Bárcenas. Os populares dan un argumento de peso: o caso Gürtel e a inacción do PP nisto constitúen unha vía de escape para Zapatero e o seu Goberno, a quen os populares acusan de estar totalmente bloqueado. “Témolo acurralado, pero dámoslle unha vía para desviar a atención”, comenta un membro do PP. Pero Rajoy é moi seu, e os populares, os de Lugo e os de resto de España, teñen que seguir agardando acontecementos.

Agora que se está a falar por todas partes do diálogo social en España (que non en Galicia, por certo), teño que contarlles un chisme en relación cos problemas que teñen o PSOE e o BNG para colocar á xente que quedou fóra da Xunta trala derrota electoral. Que foi de Pastor Fuenteseca, outrora secretario xeral de UGT en Lugo e recuperado por Ricardo Varela como director xeral de Formación e Colocación na Xunta bipartita? Pois seica acaban de nomealo vicexerente da Fundación Tripartita para a Formación no Emprego, un ente para toda España que administra os fondos que reciben os sindicatos e as empresas para formar aos traballadores. Foi unha sorte para Fuenteseca, porque no sindicato non ía ser ben recibido e no centro docente ao que tiña que volver non había praza para el, polo menos ata o curso que vén.

Tanto falamos do actual presidente da Xunta, Núñez Feijóo, que nos esquecemos dos anteriores. Pregúntome que vai pasar con Pérez Touriño. Seguirá no Parlamento ata o final da lexislatura? Con que funcións? Verémolo interpelando ao seu sucesor? Ocupará o posto en Económicas que Beiras tantas veces dixo que lle concederan de xeito fraudulento? Mandarao o seu partido a un retiro dourado no Senado, como fixo o PP co seu predecesor, Manuel Fraga, elixido senador por designación autonómica? Será esa a razón da mala cara que tiña Xavier Carro (senador socialista por designación autonómica), durante o discurso de investidura de Núñez Feijóo, porque tería que cesar, no caso de querer colocar a Touriño no pazo da Praza da Mariña? Por certo, o coruñés Carro sentouse canda outro socialista, Gómez Besteiro, presidente da Deputación de Lugo, nunha ringleira na que tamén estaban a vicepresidenta deste último Lara Méndez e mailo alcalde da capital, López Orozco.

Todo isto vén a conta de que hai unhas semanas, aló por febreiro, acordáronse de Fraga os membros de Grugalma, unha asociación que agrupa aos galegos de Madrid e que preside dende hai tempo Manuel Mourelle de Lema, que creo recordar que era profesor de Xornalismo nalgún sitio. E acordáronse para propoñer que se poña o nome de don Manuel a algunha das “macroobras que están en trance de execución en Santiago de Compostela”. Propoñen unha estación do AVE Manuel Fraga ou un aeroporto internacional de Galicia Manuel Fraga ou, o que me parece lóxico (se non a demolen, que eses cartos si que os dariamos por ben investidos moitos galegos), a Cidade da Cultura Manuel Fraga. Nunha florida prosa, Mourelle dicía daquela que ía trasladar esta proposta ás institucións oficiais. Non sei que pensará don Manuel disto, el, que xa está nesa etapa da vida na que a xente está de volta das homenaxes.

Como a carta é tan riquiña, non me resisto a reproducir o último parágrafo no seu idioma orixinal:

[...] Creemos hacernos eco de la gran mayoría de los gallegos en general, si sugerimos, y reclamamos a la vez, que el nombre de un tan ilustre prohombre gallego, preclaro docente, escritor y político, como lo es MANUEL FRAGA IRIBARNE, figure al frente de alguna de las futuras macroobras que están en trance de ejecución en Santiago de Compostela, cuales podrían ser: o la futura estación del AVE, o la Ciudad de la Cultura, o el, ampliable, aeropuerto de Lavacolla —topónimo que ya tiene el honor de llevarlo el pueblo en cuya demarcación está el “Campo de aviación”, que se decía antes pueblerinamente. No sería, pues, un agravio para tan histórica y bella localidad coruñesa suprimir su, ya histórico, nombre —lo está en el Camino de Santiago— en el aeropuerto central de Galicia, si así ocurriese.

Florido, non si?

É significativo o dato que dá Miguel na súa entrevista deste domingo (na primeira pregunta): Blanco levaba cinco anos en todas as quinielas para ser ministro. Creo que era a pregunta máis repetida polos xornalistas galegos nos últimos anos. Mesmo o recollimos nos albores da plataforma Galiciaé. Velaquí a foto oficial que figura na páxina web do ministerio.

E que será de Comisións Obreiras de Lugo co relevo na dirección nacional do sindicato? En principio, non semella que vaia haber cambios, aínda que o sindicato galego e o lugués eran, aparentemente, partidarios do derrotado Xosé María Fidalgo. Xan María Castro, o dirixente galego, mesmo confesou publicamente as súas preferencias. Pero a cousa foi tan axustada en Madrid e isto está tan lonxe de todo que non semella que vaia influír no rumbo da central en Lugo.

Todos coinciden en que isto supón unha certa viraxe á esquerda por parte do sindicato, semellante á que deu Esquerda Unida ao devolverlle o protagonismo ao PCE. Por Galicia andan a dicir que a CIG, catapultada polo cogoberno autonómico bloqueiro, estálle a comer terreo a CC.OO. en toda a comunidade. Haberá que agardar acontecementos.

É ben sabido que hai un certo fariseísmo na clase política española. O PSOE riscou as vestiduras porque o PP apoiou a un partido nacionalista, ERC, para botarlle abaixo os orzamentos ao Goberno no Senado. Os socialistas bótanlle en cara ao PP que agora si lle vala un acordo cos nacionalistas e, en cambio, critique os que subscribe o PSOE con grupos coma ERC, o BNG, o PNV ou CiU. Pero non é a primeira vez que populares e nacionalistas votan xuntos. Na pasada lexislatura, mesmo o BNG ten sacado adiante algunha proposta co apoio do PP. Claro que desta volta o debate incrementouse polas declaración de Tardá e, posteriormente, Fraga. O político vilalbés vén de matizalas este luns. A súa explicación coincide practicamente coa que expuxo a coordinadora do PP no Congreso, Soraya Sáenz de Santamaría, o mesmo xoves onde Buenafuente. Daquela, a parlamentaria do PP dixo que Fraga falaba de pesar, porque “don Manuel é un político que vén da aldea e na aldea usan a romana [un instrumento que obriga a colgar cousas] para pesar”. Non sei que tal lles sentaría ese comentario aos de Vilalba.