Posts etiquetados ‘prensa’

Paradoxos no quiosco

Mércores, 3 de Outubro, 2012

HAI UN clásico do outono que sobrevive: o coleccionable. Entre finais de agosto e comezos de setembro invade as pantallas televisivas e os quioscos de prensa, eses sitios famosos porque os seus donos son quen de meter nun espazo mínimo cousas que aos demais non nos caberían nunha casa enteira. Pero os quioscos están cambiando, sobre todo os seus contidos. De cando en vez fago a proba e pregunto por cousas raras, e os quiosqueiros responden mirándome cunha cara que pode ser ou de pasmo (“de que século virá este tipo?”) ou de lembranza (“canto hai que non vexo iso que me pide!”), ou de conmiseración (“pobre, xa chochea”). As fotonovelas deixaron de existir (agás, creo, as de ‘Mongolia’); as revistas de pasatempos son ou de sudokus ou de sudokus e algo máis, e hai dous veráns pechou o derradeiro cómic erótico español, cando en tempos houbo catro ou cinco. Iso concorda co feito de que, en xeral, o cómic barateiro, o de sempre, case desapareceu dos quioscos españois. Corín Tellado, que outrora copaba estes negocios, xa non está, aínda que si podes atopar o romanticismo de Harlequin. Quen si continúa é o gran novelista popular español, Marcial Lafuente Estefanía, autor de centos de novelas do salvaxe Oeste. Por un paradoxo do destino, este toledano que empezou a publicar en Vigo volve estar agora nos quioscos cunhas edicións feitas… en Miami! Curioso para un tipo que só estivo unha vez en Estados Unidos.

Filosofía

Martes, 25 de Xaneiro, 2011

A FILOSOFÍA custa seis euros; 5,90 concretamente. É o prezo dunha revista filosófica que vén de saír e que o venres me sorprendeu no quiosco. Acabeina mercando: por curiosidade e pola dobre ousadía dos editores: por facer unha revista nestes tempos deprimidos (tamén fan outra sobre psicoloxía) e polo tema escollido. É mensual, claro, porque non me imaxino a ninguén mercando filosofía cada semana, aínda que estes días vexo un coleccionable de grandes pensadores. A revista teríame solucionado o apuro que pasei no BUP cando o profesor de Filosofía, que quería demostrar a presenza da súa materia na vida diaria, pediu que lle leváramos unha nova filosófica publicada nos xornais desa semana. A min salvoume unha recensión, en El País, sobre un libro de filosofía en galego. Naquela clase eu tiña un compañeiro que se volveu devoto de Nietzsche: dicía que tiña un póster del no dormitorio e que mesmo lle chegara a contar os pelos do mostacho. Nietzsche é o autor de ‘Así habló Zaratrustra’, o libro que vén co número un da revista filosófica; co seguinte darán un de Freud. “Pensar é un luxo”, din na páxina 3. E se noutros tempos eu pasearía polas rúas exhibindo (case procazmente) tal libro, eu desta volta leveino para casa ben envolvido no xornal, non vaia ser que alguén pensara que eu era un delincuente perigoso, que le libros (raros), acumula papel e pensa.