Posts etiquetados ‘Gómez Besteiro’

Deputacións

Luns, 10 de Novembro, 2008

Os presidentes das deputacións, no parque do Rato

O pasado venres xuntáronse uns cantos presidentes e vicepresidentes de deputacións para facer unha Declaración de Lugo, na defensa destes entes que están a cabalo entre o poder local e o autonómico. Estaban vintetrés ou vintecinco, segundo as informacións oficiais, presididos todos eles por Xosé Ramón Gómez Besteiro. O número é moi significativo, pois representan o 61 por cento das existentes en España (non hai nas comunidades autónomas uniprovinciais), e a listaxe é moi interesante.

Estaban moitos do PSOE (por exemplo, Barcelona e Teruel), algún do PP (Salamanca), un de ERC (Lleida), faltaban os tres vascos e… dous galegos, os dous que non son do PSOE, é dicir, o ourensán Xosé Luís Baltar e o pontevedrés Rafael Louzán. Son xusto os dous que hai uns días tiveron un rifirrafe no Parlamento cos dous presidentes socialistas galegos (Gómez Besteiro e o coruñés Salvador Fernández Moreda) sobre viaxes… Referíanse ás viaxes fóra de España, aínda que, se cadra, tamén abranguían as de dentro.

Vicesecretario?

Xoves, 24 de Xullo, 2008

As miñas fontes non me negan de plano a posibilidade de que Ricardo Varela sexa vicesecretario xeral do PSdeG, como apunta algún confidencial dixital, pero danme a entender aquilo de “vas por mal camiño”. Ou sexa, que seguirá habendo un lugués no segundo chanzo do PSOE, como en Madrid, pero non como vice, senón como secretario de Organización, como ata o de agora.

O que si está claro é que Xosé Ramón Gómez Besteiro vai estar na executiva… mellor dito, vai seguir, porque xa é membro dela. É unha das consecuencias de presidir unha deputación. Tamén é de supoñer que seguirá Ismael Rego, responsable do grupo parlamentario socialista.

A incógnita está en ver se no congreso deste fin de semana vai entrar alguén máis de Lugo na cúpula dos socialistas galegos. Falan de reforzar a presenza feminina. Terá algunha posibilidade por aí Lara Méndez, outra desas “políticas en ascenso” do PSOE?

Quen seguro que sabe todo isto é Luis Ángel Lago Lage, Lucho, secretario provincial do PSOE lugués. Pero está cociñando tanto estes días que non se pon ao teléfono: é responsable dun dos relatorios. Por certo, o seu cargo tamén podería estar a disposición de Pérez Touriño, que é quen nomea os secretarios provinciais, pero coido que por aí non vai haber novidades estes meses.

Algún día teño que empezar a promocionar a Lucho como director xeral: hai anos, dende a UXT saíra o rumor, benintencionado pero despistado, de que ían nomealo director xeral da Garda Civil; agora, é presidente da comisión de Interior do Senado. Tanta proximidade ás áreas de seguridade do Estado dá que pensar. Pero mellor non o promociono, que entón veriamolo menos por Lugo.

A revolución de Cacharro

Luns, 16 de Xuño, 2008

Despois de escribir sobre os cambios na Deputación, resulta que este luns volvimos ver a Francisco Cacharro polos seus corredores, como nos vellos tempos. Era polo da colocación do retrato oficial, que xa contei aquí hai unhas semanas que era obra dunha pintora madrileña. María Xesús Pérez Castillo (ela asina sen o primeiro apelido) chámase a elixida. Hoxe, o ex presidente recoñeceu que só estivo con ela unha vez, nunha visita a Madrid; que ela insistira, porque dicía que non abondaban as fotos que lle mandaron dende Lugo. E abofé que conseguiu un retrato bastante realista, ao que Carmen Gosende, a dona de don Francisco, deu aprobación cun sorriso.

No seu discurso, don Francisco recordou os seus profundos vencellos co pazo de San Marcos: fixo alí o Bacharelato, cando era instituto, e tamén estudou Maxisterio e traballou como inspector cando o edificio pertencía a Educación. E tivo o seu toque retranqueiro, cando se preguntou polo significado de que “o colguen a un”. “Ten unha repercusión afectiva importante”, sinalou.

Polo de agora, e posiblemente por bastante tempo, vai estar só. A súa chegada ás paredes da Deputación provocou unha revolución. Se ata hai uns días era Luís Cordeiro o que nos despedía (en retrato) cando íamos camiño dos plenos, agora vai ser Cacharro… pero uns metros antes. Aprézase nas fotos. Velaquí como estaba a parede o 18 de abril, cando se fixo a homenaxe a Cordeiro.

Homenaxe a Luís Cordeiro o 18 de abril de 2008

E velaquí abaixo, como estaba hoxe (a porta que se apreza ao fondo é a mesma que na foto de enriba se ve á esquerda):  

Colocación do cadro de Cacharro na Deputación

Haberá que dar unha man de pintura, porque o retranqueo do retrato de Cordeiro (que agora está máis preto da entrada, na veciñanza de Julio Ulloa e Rego, dous dos últimos presidentes do franquismo) deixou unha marca na parede.

Ah: e por fin temos unha foto dos tres vicepresidentes xuntos!

Entrevistas

Xoves, 12 de Xuño, 2008

A pasada fin de semana estivo chea, polo menos nas miñas lecturas, de entrevistas políticas luguesas: Gómez Besteiro, Barreiro, Fraga. Os dous últimos falaban en medios que non lles son afíns e algún mesmo é combativo con eles e as súas ideas.

O anterior presidente da Xunta, como xa contou Antonio Riva nos seus Susurros, demostrou unha curiosa afinidade con outro lugués, Xosé Blanco: aos dous gústalles máis Obama que McCain. A Fraga gústalle porque o candidato demócrata é “de centro reformista, coma min”. Na entrevista, que debe de ser unha das primeiras en El País que non lle fai María Antonia Iglesias (aquilo non eran entrevistas, senón batallas campais), a Fraga acurrálano falando de temas como a pena de morte. E a Don Manuel sáelle “o seu pronto” (sic). Sen embargo, é unha cousa entrañable: ao ex presidente xa se lle ve en plan avó, contando cousas do pasado. Moi boa a anécdota de que na foto de Palomares estivo a piques de saír cunhas rapazas moi xeitosas.

O anterior vicepresidente segundo da Xunta, Xosé Manuel Barreiro, non só é entrevistado en A Nosa Terra senón que o semanario nacionalista mesmo leva a conversa á portada. Deberon de ficar abraiados os populares de toda Galicia. E o titular é impresionante: “O PP galego está hoxe unido e preséntase como un dos máis dialogantes. Pode ser o modelo para Rajoy”. O curioso é que, por máis voltas que dou, non atopo esa frase na entrevista. Así que entendo que é unha interpretación do periódico… Será unha mensaxe oculta cara ao PSOE? Un aviso por se algún día o BNG e o PP teñen que pactar? Deste tema fala Barreiro, quen di que, na zona rural, os votantes destes dous máis partidos están máis próximos que os do PSOE e o Bloque.

E da de Gómez Besteiro, o mellor foi iso de que el non se considera “político emerxente” no PSOE galego. Algunha vez téñolle feito chistes sobre iso e el insiste en desbotalos. Non sei se é que non quere oír falar do tema ou se é aquilo de que non o vexan demasiado, non vaia ser que sexa contraproducente.

Moi instrutivo todo.

Como cambian os tempos (e 2)

Domingo, 8 de Xuño, 2008

Un dos botóns de mostra do cambio dos tempos na Deputación foi a festa dos seus empregados, Santa Rita, o pasado 22 de maio. Desta, os agasallos foron menos esaxerados que noutros tempos: unha reprodución dunha lucerna. Foi curioso oír a Gómez Besteiro prometéndolle ao cura que o próximo ano irán máis funcionarios á misa da patroa. Pero o mellor chegou na sobremesa, cando a xente empezou a animarse e comezaron a oírse cancións que noutros tempos a ninguén se lle pasaría pola cabeza cantalas nesta festa: O carro, Galiza ceibe… Si, os grandes clásicos do primeiro nacionalismo galego.

E é que a Deputación estase a encher de bloqueiros de todo tipo, mesmo algún histórico, como Manuel Castiñeira Castiñeira, que hai uns días incorporouse á área de Asistencia aos Concellos. Ocupaba a secretaría do Concello de Begonte, e antes estivo na de Becerreá, e nos comezos da democracia, cousa que as xeracións máis novas non lembran, foi candidato do BN-PG (o predecesor do actual BNG) en varias eleccións, acompañado de Lois Diéguez e Pedro Luaces González-Rosón que acabou sendo durante o Cacharrismo o responsable máximo da área de Recursos Humanos. Por certo, un dos seus compañeiros de candidatura, García Mel, tamén é dos membros do staff da nova Deputación bipartita.

 Reparto de plantas no Rato

E outro signo do que cambian as cousas é que nos vellos tempos disque as funcionarias facían cola diante de Cacharro para bailar co presidente da Deputación. Coa cousa da bicefalia que hai agora, agardábase que o día de Santa Rita se fixeran dúas colas, unha para Gómez Besteiro e outra para Xosé Antón Bao. Pero o vicepresidente tivo que irse, para un acto organizado, precisamente, por este xornal, e non foi posible ver quen tiña a cola máis larga.

De tódolos xeitos, xa ven que ao presidente dáselle ben isto das colas, como demostra nesta foto do reparto de plantas o Día do Medio Ambiente.

Como cambian os tempos (I)

Xoves, 5 de Xuño, 2008

Hai que ver como cambian os tempos. Moitos insisten en que Xesús Vázquez, presidente da Federación de Asociacións de Veciños de Lugo, era un dos máis conspicuos representantes do PP e que algúns dos seus directivos son destacados militantes do partido. Sen embargo, velaquí o teñen, a carón do novo presidente da Deputación, o socialista Xosé Ramón Gómez Besteiro, participando no reparto de plantas co gallo do Día Mundial do Medio Ambiente.

Reparto de plantas no Rato (Foto: XESÚS PONTE)

Non vou ser malo, porque a cousa ten explicación: as plantas repartidas están relacionadas cos hortos veciñais que a federación administra, por conta da Deputación, no paseo do Rato. E, ademais, moi parvos serían Vázquez e os seus se non se arrimaran ao sol que máis quenta. Non si? Agora mesmo, como din por aí, fóra do PSOE ou do BNG vai moito frío.

Non se perdan tampouco o detalle do cativo no colo do presidente: non hai político que se prece que non teña unha foto cun cativo! Era, realmente, o respaldo popular que lle faltaba ao novo presidente e disque futuro home forte do PSOE… non sei se lugués ou galego ou nacional. 

 

As indirectas de Barreiro

Xoves, 29 de Maio, 2008

Estivo ben o pleno do luns sobre os primeiros orzamentos da Deputación de Lugo que elabora o goberno bipartito, aínda que confeso que nalgún intre aos xornalistas custounos manternos despertos (as cinco da tarde é unha hora demasiado próxima á de xantar).

Un dos máis creativos foi Xosé Manuel Barreiro, quen lanzou unhas cantas indirectas, que non lle recolleron. Por exemplo, cando se desculpou dicindo que non vai deixar de falar en galego, “que é a miña lingua natural”, pero que tiña que facelo en castelán. E o que dixo en castelán foi unha cita textual do socialista Manuel Martínez queixándose da demora con que Francisco Cacharro presentara os seus derradeiros orzamentos (o 3 de xaneiro de 2007, para ser exactos).

Despois, fixo un par de alusións ao BNG, que os seus deputados deron por non recibidas. Unha foi cando recordou que algún grupo da Cámara apoiara iniciativas en prol do sector primario como a que presentou o PP (tachada de ”demagóxica”, precisamente, polo Bloque). A outra, cando afirmou que hai membros do goberno que traballan e outros que non. E, engadiu, no PP saben quen son.

O máis directo, sendo indirecto, foi cando acusou a Regina Polín, deputada de Economía e encargada de defender o proxecto orzamentario, de non ter nin idea da súa área. Díxoo cunha pregunta: “Pero vostede é responsable de Economía na Deputación?”

No grupo de goberno estiveron un pouco durmidos. Ata a segunda réplica non se decataron de que Barreiro estaba a comparar orzamentos (previos ao gasto) e liquidacións orzamentarias (posteriores ao gasto). Iso si, cando se decataron dixéronllo dúas veces: unha, Polín; a outra, o presidente, Xosé Ramón Gómez Besteiro, que este martes estaba moi preocupado polas interrupcións do voceiro popular a Polín.

Para a posteridade pode quedar unha frase do propio Barreiro, cando o político do PP dixo aquilo de “A culpa de quen é? Do PP”… Díxoo, por suposto, con retranca, e despois de que Antonio Gato sacara a pasear polo debate a guerra do Iraq.

Reacción

Venres, 16 de Maio, 2008

A orde do día da xunta de goberno da Deputación da semana pasada cabía nunha cara dun folio. Aos poucos, o PP propuxo, con moita retranca, que estas xuntanzas deixen de ser semanais e pasen a ser mensuais, pola falta de temas e para aforrar cartos públicos. A resposta do bipartito da Deputación chegou coa xunta de goberno de hoxe: dezaseis puntos na orde do día. Tampouco é plan isto de pasar dun extremo ao outro, pero ás veces os políticos de Lugo fan as cousas para darlle nos narices aos da outra beira. Claro que, mentres non haxa orzamento para este ano (tocará este mes, dicía Gómez Besteiro o outro día en Telelugo), non haberá moito que repartir.

E falando de Deputación. En marzo contara eu a historia dun correo interno da Deputación que acabou en mans do PP e, posteriormente, saíu á prensa (Tulix foi o que mellor entendeu a miña metáfora). Curiosamente, estes días pasou algo semellante, aínda que desta volta o correo que se escapou partiu do PP: unha axenda de actividades para a semana que vén. Inocua, pero seguro que interesante para os seus rivais políticos. Haberá contraataque diputacional?

Os 44

Venres, 18 de Abril, 2008

 Homenaxe a Luís Cordeiro na Deputación

Vai ser este luns e serán 44 a elixir. Falo da elección dos compromisarios do PP de Lugo para o congreso nacional de xuño, unha cita que algúns cren que pode ser a penúltima posibilidade de tentar socavar o poder de Barreiro no partido. A última será a renovación do comité local, que vai ser despois do verán. Hoxe pregunteille a Cacharro, no acto de homenaxe a Luís Cordeiro, se vai ir á elección de compromisarios. E díxome que era a primeira noticia que tiña da xuntanza. E a continuación deu a entender que xa ten a axenda ocupada.

Hoxe, por certo, a súa presenza no pazo de San Marcos espertou un interese morboso. Saudaríase con Barreiro? Pois din que si (eu non estaba presente), e dúas veces, ademais: unha á saída e outra á entrada. Gómez Besteiro, por respectar o protocolo, xerou a foto máis agardada, pois, ao mandar colocalo dentro da zona de autoridades (o anterior presidente quedárase afastado), púxoo xusto a carón de Barreiro.

 

Milagrosista

Xoves, 17 de Abril, 2008

Presentación dos premios Milagrosistas do Ano 2008

Non vou falar mal dos premios aos Milagrosistas do Ano, que concede cada ano a asociación veciñal, empresarial e comercial que preside Xesús Vázquez. E non o vou facer, entre outras razóns, porque eu tamén recibín un destes premios. Foi no 2001, o mesmo ano en que elixiron por primeira vez un Milagrosista de Honra, que foi Francisco Cacharro. Recordo que no acto estiven a carón dun concelleiro de Urbanismo que se chamaba José Ramón Gómez Besteiro, e se a memoria non me falla, creo que non volveron a conceder outro Milagrosista de Honra (aínda que alguén me dixo que o ten Ramón Arias, un dos máis activos dirixentes da asociación). Este ano van dar outro: a Gómez Besteiro, precisamente. Irá nos requisitos do cargo?