Posts etiquetados ‘electricidade’

O tempo entre luces

Martes, 28 de Xaneiro, 2014

ESTES TEMPOS que vivimos pódense interpretar a partir dunha lámpada (de baixo consumo, por suposto). Poderiamos arrincar pola ‘cacharrería electrónica’, todos eses aparellos que día tras día van enchendo as nosas casas e que funcionan inapelablemente con electricidade (empezando pola batería do móbil). Seguro que Papá Noel e os Reis Magos fixeron crecer este parque electrónico.

SEGUE AQUÍ

Notario para contador

Mércores, 30 de Decembro, 2009

O malo de escribir artigos viscerais é que hai que deixalos repousar e suavizalos despois. Pasoume co do domingo pasado, sobre as eléctricas: na primeira versión había parágrafos demasiado incendiarios, que tiven que puír. Ademais, quedáronme cousas no tinteiro e, por se fose pouco, na web alguén comentou que eu, que paguei a luz por última vez en outubro, son un afortunado, porque hai xente na cidade de Lugo á que Unión Fenosa non lles pasa o recibo dende setembro.

Deixei sen contar que dende hai meses teño un aparello na casa moi sensible, que salta cada vez que baixa a tensión ou se vai a luz. Ten un rexistro e nel vexo que dende o 13 de novembro leva contabilizados dez cortes de luz, o último, o pasado día 23. As eléctricas chámanlles a eses baixóns ‘chispazos’ e non lles dan importancia. O preocupante é que iso non pasa na miña aldea de 798 veciños, senón nunha cidade de 96.678 habitantes.

E hoxe, a piques de rematar este 2009, sigo a agardar que a miña compañía subministradora me cobre a luz que consumín dende o 7 de setembro. Estou seguro de que unha das facturas que me agarda vai estar a cabalo entre o 2009 e o 2010: é dicir, como para dentro duns días se anuncia unha suba da luz, haberá unha parte que me cobrarán a prezo do 2009 e outra coas tarifas novas. Xa pasou algo así a comezos de ano. E eu volvereime a sentir inquedo, case estafado. Porque o que fan as eléctricas é matematicamente correcto, pero… Explícome: en xaneiro cobráronme na mesma factura o consumo eléctrico de 25 días do 2008 e o de 13 do 2009. Como os 25 días representan o 65 por cento do período, facturáronme a prezos de 2008 o 65 por cento do consumo. Xa: e quen me asegura que no 65 por cento dese período eu gastei exactamente o 65 por cento da luz? Quen me di a min que non gastei o 80 por cento (e entón estou pagando de máis) e non o 20 (e entón estou pagando de menos)?

Así que estou por chamar a un notario, para que na tarde deste día 31 levante acta do que marca o meu contador, ese aparello que, por certo (igual que nos ocorre a todos), nin é da miña propiedade nin teño dentro da casa.

Goberno xeneroso

Luns, 27 de Xullo, 2009

A lámpada

Aproveitando que tiña que pasar por diante de Correos, hai uns días fun recoller a lámpada de baixo consumo que nos regala o Goberno, e que por fin se reparte en Lugo despois de que o fixeran noutras provincias de España. Ía xa preparado para poñerme no peor: seguro que é de 9 W e que non hai posibilidade de elixir, pensaba eu. No segundo acertei, pero no primeiro, para a miña sorpresa, non. A lámpada é nada menos que de 18 vatios, que equivale a unha de 100 das tradicionais. E pensar que hai dúas semanas tiven que ir mercar unha! E a sorpresa medrou cando descubrín que o agasallo do Goberno é de marca Philips, que no Dia do barrio custaba hai unhas semanas non recordo se seis ou nove euros. Ou sexa, que o Ministerio de Industria foi espléndido desta: para o agasallo non escolleu unha lámpada de 9 vatios (45 nas tradicionais) ou 12 vatios (60), senón que foi mercar do melloriño: supoño que a multinacional holandesa faríalle prezo.

Iso si, hai tres detalliños que me chamaron a atención. Por unha banda, por ningún sitio explican que se fai con estas lámpadas cando se funden, que creo que non se poden (deben) tirar co lixo normal. Tamén me chamou a atención o lema da campaña, Un pequeño gesto para ti, un gran gesto hacia todos. A nós quédanos moi acaído, porque en Lugo empezaron a repartilas case coincidindo co corenta aniversario do día en que o astronauta Neil Armstrong dixo algo moi parecido sobre a superficie da Lúa.

E o terceiro que me chamou a atención é que o vale para retirar a lámpada vén outra vez xunto coa nota na que Begasa anuncia que dende o pasado 1 de xullo temos que buscar unha compañía comercializadora de electricidade. Desta, a diferenza das que enviou nos pasados meses, aclara en letra pequena que, se non escolles, Begasa vaite mandar a E.on ou Unión Fenosa Metra “segundo corresponda”. E pregunteime: “Segundo corresponda… que?” Non tería estado mal que a eléctrica que ata o de agora subministraba luz a Lugo explicara que, segundo o código postal que teñas, vante mandar cunha ou con outra.