Posts etiquetados ‘caixas’

Pinturas

Martes, 13 de Maio, 2014


MOITOS galegos, polo menos os do sur, debémoslle o noso (hipotético) coñecemento da arte galega á Caja de Ahorros Municipal de Vigo, moito antes de ser Caixavigo, Caixanova e, por suposto, antes da frustrante fusión. Os seus calendarios non só eran moi populares senón que serviron para saber de artistas que, doutro xeito, non teriamos coñecido. Recordo un, de non sei que ano, que se abría coa ‘Habitación de un marino viejo’, un óleo de Urbano Lugrís que é moitos cadros á vez. Quedei tan impactado con ese exemplo de minuciosidade que me volvín devoto deste pintor coruñés e vigués. Anos despois, fixen unha excursión a Santiago só para ver unha exposición sobre el que montara Caixa Galicia. O cadro en cuestión estaba alí, como moitos outros que eu xa vira nunha mostra anterior, e en case todos era evidente o paso do tempo e quizais o descoido: manchas, raias, decoloracións nos bordes, algunha humidade… A caixa do sur era a que achegara boa parte das pinturas, incluída a do mariño, porque ten (tiña?) unha das mellores e máis completas coleccións de arte galega. Estes días, que vexo a diario un cadro dun dos pintores daquel memorable calendario, penso naquel descoido e na preocupante posibilidade de que a colección se disperse: total, os novos donos non saben quen son Quessada, Lugrís, Laxeiro, Sotomayor… ben, quizais moitos galegos, tampouco, e menos agora que non hai calendarios para popularizalos.

A fusión viguesa

Martes, 27 de Setembro, 2011

ISTO da fusión das caixas é un tema apaixonante, aínda que están empeñados en poñernos pedras no camiño: primeiro falaban de que a fusión era para manter as caixas, e agora resulta que o que hai é un banco; despois, que era para que seguiran sendo galegas e privadas, e agora agardamos por investidores estranxeiros e por esa ‘nacionalización’ sui géneris que nos gastamos en España. Menos mal que recuperamos a Castellano, un executivo interesante. Con tanto movemento en poucos meses (de Novacaixagalicia a NCG Banco en poucos meses), non deu tempo nin para que se beneficiaran os fabricantes de carteis. En Vigo, por exemplo, aínda seguen lucindo os carteis de Caixanova en moitas oficinas; descoñezo se na Coruña é ao revés. En cambio, é en Lugo onde noto máis o peche de oficinas que competían: será porque en Vigo non as controlaba como aquí. A que segue en pé na cidade do sur é unha oficina que loce os seus nove preciosos chanzos, intimidando a todo aquel que leve unha cadeira, sexa de pequeno ou de roldas. É, posiblemente, a oficina menos accesible que vin nunca, pero, polo movemento, tamén debe de ser unha das máis rendibles. En Vigo tamén están moi fachendosos pola fusión: están convencidos de que gañaron, aínda que a Xunta e os políticos do norte din que non. Estes días chegoume a confirmación de que en Vigo teñen razón, porque esta caixabanco unificou o seu código, ese número polo que empezan todas as contas. Adiviñan cal é o novo? O 2080, o que tiña Caixanova.

(Corrección: na edición impresa aparece un erro: o código de Caixanova e, agora, de Novacaixagalicia é o 2080 e non o 2800, como saíu publicado por un baile de números.)

Caixa Breogán?

Venres, 23 de Xullo, 2010

Este venres vanse divulgar os exames de fortaleza (stress test) das caixas e os bancos españois. Estarán, por suposto, as dúas galegas, que a este exame estanse presentando xuntas, sumando datos que por agora van por separado. O curioso é o nome que elixiron para presentarse e que a moitos nos pasou inadvertido: Breogán. Non teño moi claro, porque as crónicas non o din, se se trata de Caixa Breogán ou Breogán a secas.

Leo por aí que a denominación foi elixida polo Banco de España, igual que chaman Júpiter á entidade que van formar Caja Madrid e Bancaja. Teño entendido que a denominación é un dos temas pendentes da fusión: igual convocan un concurso público, como fixera Caixanova para elixir o seu moebiusano logotipo.

O problema do nome Breogán, tan galego el, é que haberá inflación: non só o principal equipo de baloncesto de Lugo, senón tamén a nazón de Breogán (que bucólico!) que propoñen os socialistas agora (e antes os nacionalistas) para o futuro Estatuto galego.

E pregúntome: se as caixas elixen este nome, daranlle máis subvencións ao Breogán?

Pero é mellor que lle vaian buscando axiña un nome, porque xa hai chistes (escatolóxicos) na rúa.