Archivo de ‘BNG’ Category

Lage non quere apertas

Martes, 11 de Novembro, 2008

Orozco e Lage, saudándose

Pasou no pleno do luns en Lugo sobre a cuestión de confianza. Ao seu remate, unha vez que a abstención do BNG permitía a López Orozco sacar adiante os seus orzamentos e manterse na alcaldía, os líderes da oposición achegáronse, educados eles, á mesa presidencial para saudalo. Nada máis achegarse Xosé Anxo Lage, o alcalde ofreceuse, cun sorriso de orella a orella, a darlle un abrazo. E Lage dixo que non: “Cun apertón de mans tes máis que suficiente”. Temería que fora o abrazo do oso? O certo é que Lage non quixo apertas, pero quedou ben apertado coa decisión de se abster.

Políticos e cregos

Venres, 7 de Novembro, 2008

O 'funeral' de 'Los muertos van deprisa'

Estes días vin na TVG un tráiler de Los muertos van deprisa, a película que Ángel de la Cruz rodou por etapas en Ribadeo. E chámame a atención ver ao comunista, descreído e anticlerical Delmiro de Padre Casares facendo neste filme, precisamente, de crego. No tráiler vese que Delmiro, ou sexa, Antonio Durán, ten curiosos compañeiros de oficio: o actual e o anterior alcaldes de Ribadeo, o nacionalista Fernando Suárez e o socialista Balbino Pérez Vacas, respectivamente. Os dous fan tamén de sacerdotes. Á vista de que Balbino foi en tempos concelleiro do Bloque, non sei se facer un chiste sobre as conexións entre o BNG e a Igrexa.

E Milucho?

Sábado, 4 de Outubro, 2008

Votacións na asemblea do BNG

O BNG celebra este domingo a súa Asemblea Nacional, que foi preparada en asembleas comarcais como a celebrada o sábado 27 en Lugo. Daquela, como vai pasar este domingo, houbo unha única candidatura que foi votada por unanimidade. Ben, computáronse dous votos en branco, entendidos por moitos como se foran en contra, pero non foi nada importante. Un podería pensar que o Movemento pola Base se cadra tiña algo de predicamento, por iso de que a súa cara visible é un meirego, Miguel Anxo Abraira, pero tampouco. Disque nalgunha asemblea de hai meses este grupo só recibiu dous votos na comarcal de Lugo.

E entre os elixidos están os que se podería esperar: moito alto cargo, moitos concelleiros, representantes de toda a comarca e todos os delegados provinciais da Xunta que pertencen á comarca de Lugo (Cosme Eladio Pombo é da de Monforte)… Todos? Non! Fáltanos Emilio López, Milucho, delegado de Medio Rural, que nin aparece na lista de elixidos nin é membro electo da Asemblea Nacional (como Paz Abraira, Xosé Antón Bao ou Rodríguez Feixoo).

Onde andará este home o 5 de outubro? É de supoñer que na feira gandeira que se celebra co gallo do San Froilán.

O San Froilán do BNG

Mércores, 3 de Setembro, 2008

O BNG vai celebrar o San Froilán cunha Asemblea Nacional, o propio día 5 de outubro en Santiago, para elixir o sucesor de Anxo Quintana como candidato á presidencia da Xunta, que está claro que vai ser o propio Quintana. Pregúntome se haberá un alto nivel de absentismo entre a representación luguesa. Quen máis quen menos terá convidados na casa, fixo.

Antes, os bloqueiros de Lugo terán que manter dúas xuntanzas: a primeira, a semana que vén, cando teñan que debatir o regulamento do congreso. A segunda será entre o 25 e o 27, cando haxa que elixir os delegados por comarcas. Será unha desas xuntanzas ás que os medios teremos que mandar fotógrafos obrigatoriamente, porque a Asemblea Nacional do día 5 será a primeira que se fai con delegados. Haberá preto de 200 en representación de toda a provincia. Dinme que toca un delegado por cada dez militantes, ou sexa, que o BNG tería uns 2.000 afiliados en todo Lugo. Non está mal —á vista do pouco participativos que son os lugueses—, para un partido con 101 concelleiros.

Agora queda por saber cando toca a visita sanfroilaneira de Quintana. Barreiro xa confirmou a de Rajoy, aínda que non sabemos a data. E en canto a Zapatero, un colega aposta a que desta volta tampouco toca.

Xa sei que estou espeso: que lle queren? Que curtas resultan sempre as vacacións!!!

O despacho de Bao

Martes, 15 de Xullo, 2008

Despacho de Xosé Antón Bao. Había ben tempo que non entraba alí e a imaxe cambiou moito. Onde antes había unha morea de papeis, acumulados polo anterior interventor, agora só queda unha estantería con varios libros, a maioría procedentes do Servizo de Publicacións da Deputación, e entre eles distingo un anuario de El Progreso. Os mobles antigos de antes desapareceron e agora hai outros máis funcionais. Gústame moito o sofá, aínda que non a súa cor (o branco debería de estar prohibido en determinados tipos de mobles, excepto se un ten chacha ou, como é o caso, un servizo público de limpeza). Os antigos mobles, polo visto, tiñan menos valor do que aparentaban. Non sei que foi deles. E nas paredes, os cadros clásicos de sempre foron cambiados por outros de Murado e Roberto González, ademais de algo que non sei se é un cadro ou unha escultura, obra de Mónica López. A pintura de Roberto (inconfundible: aparece el) ten un touro de Osborne no que se ven unhas manchiñas brancas. Un reflexo? Non, que o papel de globos pegouse e deixou marca. Unha demostración máis de que no Museo Provincial, de onde creo que proceden todos os cadros, non teñen máis sitio para meter as cousas.

Pero o máis diferente é a cor das paredes. É un deses amarelos melocotón tan de moda dende hai anos. Aínda así, cóntanme que houbo problemas para pintar con esa cor: “Dicían que un edificio coma este tiña que ter as paredes brancas, e eu preguntei por que, e ninguén mo soubo dicir”, conta Bao entre risas.

Cen anos

Sábado, 5 de Xullo, 2008

Este venres inaugurouse na Praza Maior de Lugo a exposición itinerante feita co gallo dos cen anos da saída do primeiro número de A Nosa Terra (cen anos que non foron ininterrompidos). E era moi interesante ver que xente se xuntou alí: Xosé Antón Bao, Xoán Xosé Molina, Rodríguez Pazos, Abraira (Paz), Chorén… e algún bloqueiro máis. Lóxico: trátase dun semanario do ámbito nacionalista. Máis sorprendente era ver que tamén andaba por alí Xosé Manuel Barreiro, acompañado de xente da intendencia do PP. Terá isto que ver con aquilo do flirteo que se traen entre nacionalistas e populares, para intranquilizar ao PSOE?

Exposición 'A nosa terra'

Nun instante dado, cando empezaron a mirar as portadas (como recolle esta foto que manda Camilo), pararon na do 5 de decembro de 1918, que recolle íntegro o manifesto da histórica Asemblea Nazonalista de Lugo, a do hotel Méndez Núñez. E alí Bao espetoulle a Barreiro: “Mira, xa daquela pediamos o ‘acabamento das deputacións provinciais” (apartado terceiro do capítulo terceiro, o dos problemas políticos). E o político do PP, áxil e igual de retranqueiro, respondeu: “Ah, pero entón tamén estamos nós, cando pedimos o ‘reconocimento da persoalidade xurídica das parroquias” (apartado segundo do capítulo segundo, o dos problemas constituíntes).

Cando rematou o acto oficial, apareceu unha muller botando en falta o son dunha gaita. “Nun acto así, por tanto polo que loitamos, tiña que haber unha gaitiña”, dixo a muller.

Por certo, para que vexan o que cambian os tempos, o primeiro número do veterano colega, o do 4 de agosto de 1907, tiña a portada en castelán. E no titular dun dos artigos desa primeira páxina aparecía Lugo.

O novo barco

Venres, 27 de Xuño, 2008

O novo barco, á esquerda (Foto: Toño Parga)

Un pouco perdido vimos este venres, na rolda de prensa da xunta de goberno, ao vicepresidente primeiro da Deputación, o nacionalista Xosé Antón Bao, cando un compañeiro da prensa interpelouno sobre o novo catamarán do Sil. E iso que a área responsable do barco, a de Turismo, está nas mans dunha nacionalista, María Xosé Vega, e iso que Bao é oficialmente, segundo figura no reparto de funcións do bipartito, coordinador das áreas bloqueiras.

Pero víaselle parco, como falando dalgunha terra ignota. Ou esa foi a sensación que deu. Nos medios houbo que facer algunha chamada complementaria para saber cando vai estar o catamarán a disposición do público. E non quedou moi claro se o barco xa estaba en Lugo (xa o está, dende o xoves) o se aínda viña de camiño. Por un momento, algún pensou que vai ser certo iso que din de que Vega vai por un lado e os Antóns (Bao e Veiga), por outro.

Iso si: polo que dixo Bao, xa nos podemos esquecer de que volva a funcionar o catamarán de Os Robles, a área recreativa do Miño en Lugo. Téñeno alí aparcado, a carón da escola de piragüismo, en moi mal estado. Moitas veces discutiuse se o río ten alí calado suficiente, e parece que por agora non o ten.

Apostila aos tempos cambiantes

Sábado, 14 de Xuño, 2008

Ten razón Cancións: na Deputación sempre houbo moito bloqueiro. O que pasa é que agora semella que estean desatados. Cando me falan do tema, sempre recordo a Arximiro Fernández Arias. Era o número dous da lista coa que o BNG se presentou ás eleccións municipais de maio de 1995 en Castroverde. Froito do pacto de goberno entre nacionalistas (catro) e socialistas (dous), Arximiro acabou de tenente de alcalde, ás ordes de Miguel Roberto Rodríguez, o último rexedor que tivo o BNG en Lugo antes de Severino Rodríguez de Monforte. Recordo que era o voceiro municipal do BNG e dáballe bastante estopa aos cinco do PP.

Pero ao ano, deixou o cargo e renunciou á corporación. Despois veu a moción de censura que lle deu o poder a Xosé María Fernández Arias, que hoxe aínda segue alí. Arximiro era (e é, creo) traballador da área económica da Deputación. E o rumor que correu daquela é que dende San Marcos chamárano a capítulo para que deixara o Concello. Nunca, por suposto, puidemos saber que había de certo.

Si, xa sei que parezo o Abuelo Cebolleta. Vou ter que abrir unha categoría histórica. 

E para que vexan o que cambian os tempos, unha foto dunha bandeira republicana na Deputación que levo un mes desexando poñer.

Bandeira republicana na Deputación (Foto: J. Vázquez)

Non se alarmen: eran os do grupo teatral Palimoco no acto cultural organizado co gallo do Día das Letras Galegas.

Blogs nacionalistas

Mércores, 4 de Xuño, 2008

Volvendo ao tema dos dous últimos posts: calquera diría que Xosé Anxo Lage me le (véxase o cuarto parágrafo da información de hoxe. Por certo, vexo que o voceiro do BNG en Lugo recupera a súa presenza na esfera blogueira. Lage deixárao despois das eleccións locais do 2007, mentres que a súa compañeira de grupo Paz Abraira mantivo o contacto e agora ten a dirección de antes e unha nova, dentro da rede de blogs nacionalistas. O que se mantivo activo dende o 2007 foi Xosé Manuel Becerra, voceiro do Bloque no Corgo, quen este mércores daba as notas dos exames para unha praza de alguacil-porteiro. Non sei a que esperan os bloqueiros da Deputación para sumarse ao blogmillo.

Milucho

Luns, 12 de Maio, 2008

Consellería do Medio RuralMédranlle os problemas a Emilio López Pérez, Milucho, o ex sindicalista que agora é delegado provincial da Consellería do Medio Rural en Lugo. Se hai uns días cargou contra Unións Agrarias, despois da manifestación do Ceao en contra de Leite Río, hoxe tocoulle recibir fogo amigo, xa que as críticas viñeron dende o sindicato agrario nacionalista, o SLG.

Xurxo Álvarez, o derrotado nas eleccións para a executiva labrega de decembro pasado (home que entrou no sindicato en Lugo cando Milucho era quen máis ordenaba), montou este luns unha rolda de prensa en Santiago para acusar á actual directiva de “usurpación de funcións”. E a executiva do SLG respondeu a esta rolda de prensa, na que estaban outras seis persoas, sen cortarse:

“Este grupo de persoas unicamente responde ás consignas recibidas dende a Consellaría do Medio Rural. Temos constancia de que esta estratexia se define conxuntamente co xefe de gabinete da consellaría [Xosé Manuel Puga] e co delegado provincial da consellaría en Lugo”.

Por certo, na web do SLG, no capítulo de ligazóns, non aparece a consellería, a máxima autoridade agraria de Galicia, aínda que tamén é verdade que o capítulo de links é curto.

Así que entre o leite, os casos de lingua azul, as críticas de varios alcaldes do PP, as liortas na constitución dos GDRs (grupos de desenvolvemento rural) dos Leader e, agora, as queixas sindicais, este Milucho non vai dar feito.