Archivo de ‘PSOE’ Category

O rumor antigo foi realidade

Domingo, 12 de Abril, 2009

Foto oficial de José BlancoÉ significativo o dato que dá Miguel na súa entrevista deste domingo (na primeira pregunta): Blanco levaba cinco anos en todas as quinielas para ser ministro. Creo que era a pregunta máis repetida polos xornalistas galegos nos últimos anos. Mesmo o recollimos nos albores da plataforma Galiciaé. Velaquí a foto oficial que figura na páxina web do ministerio.

A tensión

Domingo, 29 de Marzo, 2009

Xosé Rábade e Enrique Rozas, na recepción (Foto: Pepe Álvez)

Mascábase a tensión na recepción que o Concello de Lugo ofreceu ao subdelegado do Goberno o pasado mércores 25. A tensión viña das cadeiras nas que se sentaban o concelleiro encargado da Policía no goberno local, Xosé Rábade, e o concelleiro encargado da Policía no PP, Enrique Rozas. Un chisquiño antes, Rábade fixera aquelas xa famosas declaracións nas que dixera que Rozas está a ser un “tonto útil” para un sector da Policía Local. E vai o protocolo e sitúaos un a carón do outro, ben xuntiños, uns minutos despois. Así que había tensión… pero só por unha das bandas. Porque resulta que o concelleiro do PP naquel intre non sabía nada das declaracións do seu homólogo do PSOE e, de feito, Rozas chegou a falar distendidamente (pola súa banda) con Rábade. Coñeceu as descualificacións cando, á saída da recepción, interrogárono os xornalistas.

O tema, por certo, ten moi pero que moi cabreados aos populares: tanto as declaracións como a denuncia. Na reunión da executiva provincial que o PP mantivo o xoves, houbo un aplauso de apoio ao concelleiro. E o venres, o grupo municipal saíu en pleno para defender ao seu compañeiro insultado.

Unha lista única

Xoves, 26 de Marzo, 2009

logo do PSOESi, todos os rumores din que no congreso do PSOE de este venres haberá máis dunha lista, pero parece que as augas non van saír de nai. De feito, aínda que El Progreso recolle que hai dúas, chegouse a falar de máis. Pero seguramente a cousa quedará nunha candidatura única. Iso si, o que ninguén vai evitar é unha “lectura de cartilla” xeralizada. Hai un grupo de alcaldes que están dispostos a que algúns persoeiros socialistas non se vaian de rositas.

En concreto, os disparos apuntan cara López Orozco, que non soubo manter o fortín, e cara Gómez Besteiro e os deputados provinciais do PSOE, aos que os seus compañeiros de partido reprochan que non se lles ve. Claro que esta liorta vai ser interna, porque, de portas fóra, todo vai ser paz e despois gloria, que agora o que lles interesa aos socialistas é demostrar unidade na dor. Xa o verán este venres.

(Outro día escribirei sobre o Pazo de Tor.)

Si ao parque natural?

Venres, 20 de Marzo, 2009

Vista dos Ancares (Foto: EPL)

Pasada a guerra electoral, chega o momento de descubrir algunhas curiosidades. Por exemplo, ver quen gañou en Cervantes e Navia de Suarna. No primeiro fíxoo con moitísima claridade o PSOE, como é habitual; no segundo volveu a gañar o PP, aínda que só por tres votos. Supón un respaldo para os dous alcaldes, socialistas ámbolos dous: Benigno Gómez e Xosé Fernández, respectivamente. O curioso é que nestes concellos había moita polémica pola posible declaración dos Ancares como parque natural, e vai e gañan os que o defenden, os socialistas. Significa iso un respaldo dos votantes á proposta?

Por certo, non se sabe que vai ser do proxecto. O equipo saínte de Medio Ambiente asegurou que o PP de Fraga deixara sobre a mesa un texto para facer a declaración de parque natural vía decreto, co cal, se cadra, igual resulta que o partido que o rexeitou nestes catro anos vai ser o que acabe por crealo. Son os paradoxos da vida política.

Había máis nomes

Martes, 17 de Marzo, 2009

Dicíase que o Consello de Ministros do venres pasado ía nomear a José Vázquez Portomeñe como subdelegado do Goberno en Lugo, pero finalmente non houbo nada, ou polo menos non figura na reseña oficial deste segundo venres 13 do ano: haberá que mirar no BOE. De tódolos xeitos, de ser certo que ese vai ser o substituto de Xesús Otero Calvo, é posible que o nomeamento aínda tarde algunha semana máis: pode que ata Semana Santa. Vázquez Portomeñe é o segundo da Consellería de Traballo, unha das que vai manter Núñez Feijóo, e seguramente será un personaxe importante na transmisión de poderes. Así que, se cadra, igual hai que seguir agardando.

Ademais de Vázquez Portomeñe, en Lugo baralláronse outros nomes para o posto. A única condición a cumprir é que teñen que ser funcionarios do grupo A. Non hai moitos dentro do PSOE lugués: entre outros, os profesores Daniel Núñez Segade e Luis Álvarez e o veterinario Eduardo Baamonde, actualmente delegados provinciais de Política Territorial, Educación e Medio Ambiente, respectivamente… Tamén saíu o nome de Francisco Silvosa, aínda que no partido non apostaban por el. E tamén se falaba de mulleres, como unha tal Chus Navarro e, sobre todo, Concepción Burgo, catedrática de Universidad.

Coa designación da actual primeira tenente de alcalde de Lugo, deputada electa no novo Parlamento galego, matábanse varios paxaros dun tiro: por un lado, retirábase do Hórreo a unha parlamentaria pouco activa, porque as ocupacións de Burgo no Concello de Lugo impídenlle implicarse máis, e iso non interesa cando ao PSOE se lle aveciña unha etapa de intenso traballo dende a oposición. O segundo paxaro a matar era Miguel Ángel Fernández, que agora vai ter que volver ao hospital Xeral baixo unha dirección na que pode que estean algúns dos seus rivais cando era el o xerente deste centro hospitalario. A retirada de Burgo permitiría correr a lista do Parlamento galego e darlle entrada na Cámara a este deputado de Sarria, que tampouco interesa manter na súa vila por se lle fai sombra ao actual alcalde. No lugar de Burgo, entraría no grupo municipal do PSOE en Lugo Nuria Mundiña, licenciada en Dirección de Empresas que traballa para La Caixa en Sada, aínda que é de Lugo.

Pero, claro, Vázquez Portomeñe ten detrás un bo padriño, Ricardo Varela, número dous do PSOE galego, e iso son palabras maiores.

Caraveis para a rosa

Sábado, 7 de Marzo, 2009

logo do psoeOs socialistas galegos escolleron un día significativo para celebrar o congreso extraordinario que vai unxir ao sucesor de Pérez Touriño: o 25 de abril. Pero non creo que o partido da rosa vaia facer unha revolución como a dos caraveis portuguesa, senón todo o contrario. O venres, Antonio Riva apuntaba nos seus Susurros que o sucesor in pectore, Manuel Vázquez, está chamado a prepararlle o camiño a un lugués. Non sei se apunta a Xosé Blanco, como din algúns rumores, o a Xosé Ramón Gómez Besteiro, como apuntan outros. Dende logo, non a Xesús Otero, a quen algúns querían como relevo de López Orozco na alcaldía de Lugo. Outra cousa é se sae indemne da trama das multas, que por agora os únicos que o xulgaron non foron os xuíces, senón algúns posteadores (palabra que non vén de posta, senón de post) de Galiciaé e Elprogreso.es.

Antes, a comezos de abril, o partido terá que elixir un voceiro parlamentario, que pode ser o próximo secretario xeral ou non. Se non coinciden, é de supoñer que o elixido voceiro a comezos de mes deixaralle o posto ao novo xefe. E despois hai outro labor importante, que é prepararse para as europeas, esas eleccións que interesan tan pouco en España, agás aos políticos, e máis en tempos de Crise.

O de antes e o de agora

Martes, 3 de Marzo, 2009

Na entrevista con Xosé Manuel Barreiro que publica este martes El Progreso, recordeille iso de que o novo hospital de Lugo é un proxecto posto en marcha polo PP e que, despois de catro anos de bipartito, vai inaugurar un presidente da Xunta do PP. Pero despois recordei que a lista de cousas das Xuntas de Manuel Fraga que van rematar en mans da Xunta de Núñez Feijoo é máis ampla. Velaquí van unhas poucas, que recordo a bote pronto:

  • Corredor Monforte-Sarria.
  • Auditorio de Lugo.
  • Autovía Ferrol-Vilalba.
  • Plan Paradai.

Este luns discutía cun amigo concelleiro do PP sobre a causa da derrota do bipartito. Un dicía que influíu moito o do Audi e o despacho de Touriño; o outro, que os que votan menos visceralmente tamén tiveron en conta a rapidez con que se executaron algunhas infraestruturas nestes catro anos. O que pasa é que sospeito que as cousas tampouco van ir rápidas, polo menos, nos dous vindeiros anos: para facer, primeiro hai que desfacer, ou iso semella que pensa todo gobernante que se prece.

Fogo amigo?

Mércores, 25 de Febreiro, 2009

Andan circulando por internet tres presentacións en PowerPoint que teñen relación con Galicia e que estes días electorais están de moita actualidade. Unha é sobre a casa de José Blanco en Arousa, esa que chaman Villa PSOE; outra, sobre o paseo en iate de Anxo Quintana; a terceira, sobre as cadeiras (en castelán, sillas) de Pérez Touriño. As tres acabaron por chegar a esta Redacción por correo electrónico.

O sorprendente é que en tódolos casos o remitente era, supostamente, amigo: un suposto membro do PSOE galego no caso de Blanco; o BNG de Madrid no caso de Quintana; o gabinete de prensa do PSdeG no de Touriño. Se te molestabas en mirar a dirección completa (e non o nome que aparece ao abrir o e-mail), sorprendía ver que se trataba de dúas direccións de Gmail (as de Blanco e Touriño tiñan o mesmo remitente con diferente nome) e non parece moi crible que os gabinetes do PSOE e o BNG boten man do correo de Google, non?

Alcaldes

Martes, 17 de Febreiro, 2009

Quéixaseme Barreiro na Fonsagrada de que eu dou o nome do alcalde do PP que supostamente vai pasar ao PP, pero non o do rexedor do PSOE que supostamente ameazou con deixar o partido se non conseguía un servizo para o seu concello. A explicación é doada, contéstolle: do alcalde que supostamente se vai si sei o nome; do que ameazou con irse, non o teño claro, porque, ademais, houbo outro que chamou a Ricardo Varela coa mesma demanda. Ao final fixen unhas risas co alcalde de Baleira, Francisco Acal, que estaba en Bos Aires cando publiquei o meu artigo.

Houbo, por certa, moita inquietude nas filas socialistas por ese rumor: máis de un chamou preguntando a quen me refería. Pero creo que xa o sabían todos e que había un pouco de esaxeración na ameaza.

Conta atrás xacobea

Venres, 30 de Xaneiro, 2009

Raposo, Piñeiro e Blanco (Foto: Pepe Álvez)

Isto si que é facer as cousas con adianto: queda algo menos dun ano para que comece o Ano Santo compostelán do 2010 (cando eu era cativo, chamábase así e non había ningún Pérez Varela que se inventara a marca Xacobeo) e o conselleiro de Innovación e Industria, Fernando Blanco, é dicir, o do Xacobeo, fai unha presentación en Lugo por todo o alto. O salón de actos estaba ateigado. Mesmo foi todo o plantel do CD Lugo, que por algo leva publicidade da sociedade de xestión. Blanco foi breve, que aquilo era unha festa e non había por que leala falando polo miúdo de tódolos investimentos.

Como ven na foto, ao remate falou de xeito distendido cun representante da ruta principal, a francesa, e outro da que está adquirir moito pulo ultimamente, a primitiva: o alcalde de Pedrafita, Xosé Luís Raposo Magdalena, e o concelleiro de Lugo Xosé Piñeiro, respectivamente. Raposo foi, ultimamente, protagonista dun feito semellante ao que contaba eu aquí hai pouco, pero ao revés: a el non o deixou saír a muller da casa durante a fin de semana do temporal. Non pensen mal: foi por recomendación médica. Estaba tan mal que nin se lle oía cando falaba por teléfono.

Por certo, Raposo hai uns días deulle plantón a outro conselleiro nacionalista, o de Medio Rural, Alfredo Suárez Canal, cando viu a Lugo a asinar os convenios de constitución dos GDR (grupos de desenvolvemento rural) que van xestionar o Leader. O alcalde de Pedrafita mesmo chegou a mandarlle unha carta ao conselleiro para explicarllo. El, implicado no primeiro Leader que houbo en Lugo e un dos pioneiros de Galicia, estaba moi cabreado porque na xuntanza de creación do GDR dos Ancares, hai meses, nin o deixaron falar. Si, el foi un dos prexudicados pola estraña forma en que se crearon estes grupos.